Xibaaryi.com - Dal bi njëkk ci tasum xibaar ak làkki réew mi.

Mbëj : Sigicoor a ngi ñaxtu ndax dog-dog yi.

Seneweb.com : Àjjuma 3 Sàt 2010

Mbëj : Sigicoor a ngi ñaxtu ndax dog-dog yi.

Askanu Sigicoor jot naa jaamaarlook kaaraange gi àjjuma, ngir naqarlu dog-dogi mbëj (courant) yi tëwa dakk. Way-ñaxtu yi dañoo jubali digg dëkk ba jaamaarlook takk-der yi ci diirub waxtu yu bari, ci li tukke ci ndawal rajo RFM ca diiwaan ba.

Nit ñu bari, bokk na ca ab jigéen ak ab waxambaane nataalkat, la poliis ba jot a teg loxo. Xibaarkat bu SenewebNews jokkool ca péeyum bëj-saalum réew mi leeral na ne cim ndaje mu ñu amaloon alxamis, ci la kurél gi ëmb kàrce yu Sigicoor, ci kàdduy Jibril Saane mi leen di waxal, sumb doxub ñaxtu gaawu. Dogal booboo ngi ñu jàpp ba léegi.

Aayeb yalnaaw ci Ndakaaru : àtteesna démb juróom-ñaari sëriñ daara.

WalFadjri : Alxamis 2 Sàt 2010

Aayeb yalnaaw ci Ndakaaru : àtteesna démb juróom-ñaari sëriñ daara.

Yéene gi nguur gi am ngir dakkal yelnaaw ci Ndakaaroo ngi tàmbalee jur as lëf. Yoon dugalna ci loxoom ba juróom-ñaari sëriñ daara, yu nar a tëdd juróom-benni weeri kaso, lañu àtte démb, ndax liñuy xiir seeni ndongo, yu bawoo ci réew yi sës ci Senegaal, cig yelwaan. Bu sëriñ soosee ñoom jàpp ne yalwaan rekk lañu am ngir mën leen a dundal, layalkat yi ñoom neenañu dogal yu nguur gi jël la rek ngir dalal xeli way-alalal yi (bailleurs de fonds).

Baara Taal, Gaajo, Amsatu Sow Sidibe, Seriñ Mansuur Si Jamiil ak yeneen kuréeli

Politicosn.com : Dibéer 29 Ut 2010
Baara Taal, Gaajo, Amsatu Sow Sidibe, Seriñ Mansuur Si Jamiil ak yeneen kuréeli juddu-réew booloo nañu ngir jàmmaarlook Wàdd ak Kariim.

Njiiti juróom-ñaari kuréeli juddu-réew (mouvements citoyens), ànd ci biir ab ‘’Néegub wecconte xalaat’’, biral nañu gaawu ca Ndakaaru ab tëru waar (plan d'action) bob li ko jékkati di ‘’dakkal nguurug Abdulaay Wàdd te ànd ci sos ay sàrt yuy jàppandal nguur gu sell’’ ci Senegaal. Teewoon na ca ndaje moomu, Seex Tijaan Gaajo, Baara Taal, Amsatu Sow, Àlla Jeng, Seriñ Mansuur Si Jamiil. ’Ak yeneeni mbootaay, kuréeli askan yi, ñu gën leen xamee ci kuréeli juddu-réew, dañuy fexee tëral ay sàrti weccoonte xalaat yu jàppandi ngir jóg ci nguurug Wàdd gi ’’, la njiit yi jibal gannaaw lël bañu amaloon ca bis boobee. Ñi ngi waaj ab dagaan ngir ‘’aar Ndeyu Àtte Réew mi’’ ak ab doxu ñaxtu ngir bañ ñu far palinu ñaari yoon yi, ‘’muy li nguur gi teg bëtëm’’ jamono jii.

Sargalees na ndongo lu xereñ kaar ca ISAJ.

APS : Gaawu 21 Ut 2010
Sargalees na ndongo lu xereñ kaar ca ISAJ.

Iniwersite Seex Anta Jóob (ISAJ) jébbal na, ni ki ay neexal, ab nosukaay bob gàddu ak 650.000 CFA ab ndongol 23 at lu am ag Mokkal (Metriis) ci xayma bu piir, gannaaw bi mu saxalee at mu nekk moyen bu toll digante 16 ak 20/20, muy li tukke ci jibalul UCAD bi APS jot.

Musaa Gay mi jot neexal yooyee ci loxoy rektëer ba Abdu Salaam Sàll, ca xew ma ñu ko jagleloon ca rektora ba ci 11 w, mi ngi bindu ci Bànqaasu Xarala ak Tegnik ’’cig sàkkoom’’ ci 2006.

Boobook léegi, la jibal bi siiwal, ’’am na raayab Baax lool ci joηante yépp, sax do doon njiit (major) ca bànqaas ba dale at mu njëkk ma ba Mokkal bu xayma bu piir’’.

Ab fajkat bañ na lesioη donóor ngir ñaxtu.

Le Monde : Altine 23 Ut 2010
Ab fajkat bañ na lesioη donóor ngir ñaxtu.

Ab fajkat bu màcc ci anestesi( maanaam teggi mettit) tey yëngu ci ndimbal way-loru yi ci àddina sépp, bind na altine Nikolaa Sarkosi (njiitu réewum Farãs) ngir yégël ko ne lànk na ñu tappal ko lesioη donóor (Légion d'honneur), ngir wone ag ñàkk àndam ag politigu kiiraange gu Sarkosi.

Njiitu réew ma daa tànnoon Aan-Mari Guwe ngir ñu tappal ko lesioη donóor ci 14 sulet ndax ag "sóoboom ci liggéeyal réewum Farãs".

Waaye fajkatu Goxu Póo boobu, bokk ci "Médecins du Monde" (Fajkat yu àdduna si) 30 at ak léegi, yégal na Nikolaa Sarkosi ag lànkam màndarga moomu ñu ko waroon na tappal sawie 2011.

[KÀDDU] : Wàdd cim jataayu tas-xibaar ca Njénde la ci 1 Màrs 2007 :

Politicosn.com : Dibéer 22 Ut 2001
[KÀDDU] : Wàdd cim jataayu tas-xibaar ca Njénde la ci 1 Màrs 2007 :
"Maa naj diirub jiite réew mi ci ñaari at ci Ndeyu Àtte bi, Duma bokkaat ci ñiy joηante"

Rajo RFM jàllale na dibéer gii ay kàddu yu njiitu réew mi Wàdd di saxal ne du bokk ci way-joηante ci atum 2012 ndax Ndeyu Àtte réew bi dako koo tere. Politicosn.com jotnaa gis jukki bi Seex Tijaan Njaay, miy njiital bindkati APS, xaatim. Muy kon lu nguur gi diglewoon ag siiwalam. Lu ci Wàdd doon wax ? Du bokk ci way-joηante yi ci 2012 ndax Ndeyu Àttem réew mi tere na ko.

Jukki bi wax na lu yàgg ci Idriisa Sekk. Tànnees na ci as tuut : "Tàggoo naa ak moom. Du ko doon, fàwwu mu xam ko. Bu bëggee nekk njiitu réew mi, na jaar ci yeneen yoon’’, la njiitu réew biraloon.

Dénkaane yi jëm ci koor gi

OSAD: Àjjuma 20 ut 2010
Dénkaane yi jëm ci koor gi

Dénkaane yi leen Doktoor Kase baaxe, jëm ci koor gi, Orange-info, 14 ut 2010

Ki leen ko tojal : Soxna Aram Faal, OSAD

Ni ko Doktoor Kase waxe, dénkaane yii, dees leen war a jàppe ni ay tegtal yu soxal ñi dara jotul. Ñi ànd ak jàngoro, moo xam jabet, tasyoŋ, estomaa añs., li leen war moo di sàkku ndigalu doktoor.

Yéen ñiy woor, buleen ëppal, moo xam ci lekk gi la, walla ci naan gi, lu mu ci mën a doon, demleen ci ndànk ndànk.
Yéen Gembe yeek Jaañeen, Ñaŋeen yeek seeni mbokk, Doktoor Kase nee na benn jataay bi mënuleen cee dabu li leen raw ci bëccëg bépp, li gën moo di lekk lu yem, bu ca kanamee ngeen jëlaat lu yem.

NATT - Ci juróomi doomi Amerig yoo jél, kenn a ci xalaat ne Obama jullit la.

WebNews : Alxamis 19 Ut 2010

NATT - Ci juróomi doomi Amerig yoo jél, kenn a ci xalaat ne Obama jullit la.

Benn doomu Amerig ci juróom yoo jél, xalaat na, ci lu teguwul fenn, ne njiitu réew ma Barak Obama jullit la, muy li tukkee cib natt (sondage) bu Washington Post siiwal. Njiitu réewum Amerig doontale saxal na di dem ci Jàngu ba ak a jibal ag bokkam ci diiney kercen, teewul limu doomi Amerig yiy xalaat ne jullit la deñul di yokk, muy lu tekkee ci natt bi Pew Research Center def. Ci jamono jooju, limu waa Amerig yi jàppe Obama ab kercen daa wàcc ba ci génn-wàll ci benn at, maanaam 34 %.

AJ MÀKKA 2010 : Yokkees na 143 junni ci paas bi.

WalFadjri : Talaata 17 Ut 2010

AJ MÀKKA 2010 : Yokkees na 143 junni ci paas bi.

Gannaaw ubbite, ci bisub 24 suwe, gu yérug njég yu lonkoo yu jawwu yi binduwoon ngir yóbbu ujaaj yu Senegaal ca bërëbi Lislaam yu sell ya, siiwalees na démb Air Europa mi ñu tànn. Niki atum 2009, lookoo gu jawwu joojooy yóbbuwaat doomi Senegaal yi nàmm a dem ca suufus Araabi Sawudi, ak tuuti ciy coppite, la ab jibal bu njëwriñu dem beek dikk bi ci jawwu ji, saxal. Ci wàllu pey gi, lookoo gi yokk na 143 junni ci paasu daaw ba.

Njégu benn milyoη ak 134 junni CFA lañu njëkkoon a jàpp ak Air Europa. Waaye, gannaaw waxaale yi, benn milyoη ak téeméeri junni CFA la ujaaj bu nekk di fey.

«Tënk nañu saytaane yi ci weeru koor » Kon ana lu tax nit di wéy di def ab safa

Xibaaryi.com: Àjjuma 13 Ut 2010

«Tënk nañu saytaane yi ci weeru koor » Kon ana lu tax nit di wéy di def ab safaan ci biir weer wi ?

Jéngees na saytaane yi ci weeru Koor:

Abuu Hurayra nettali na ne, Yonent (jàmm ak xéewalu Yàlla ci moom) bi neena: "Bu weeru koor yegsee, dees na ubbi wunti àjjana, tëj yoy sawara te jéng saytaane yi". (Al-Buxaari, Muslim)

Yonent (jàmm ak xéewalu Yàlla ci moom) bi neena: " Weeru Koor yegsi na; weer woo xamni ci la léen Yàlla ga (digal) koor; diirub weer wi, wunti asamaan yi dañuy ubbiku, wunti sawara tëju te saytaane yi it dees léen di jéng; te am na ci weer wi ag guddi gu gën junniy guddi (weer), ku tonowoowul ngënéel i guddi gii mooy ki ñàkk (pert) " (An-Nasaayi moo ko soloo)