Elton daan na Yékini Siñoor, gàddu ndamul joηante CLAF bu 2009

yekini_jr_elton Ndakaaru, 5 Sulet (APS) - Seex Kan, ñu di ko wax ‘’Elton’’ bu ekiri Bàlla Gay, jél na ndamul ñetteelu joηante bëre dóor (CLAF), ci kaw Yékini Siñoor, ca estaad Demba Jóob bu Ndakaaru, la taskatu xibaar bu yéenekaay APS wax. Moor Taal Njaay, ñu di ko wax Jékini Siñoor, a ngi ñàkk bëré boobu gannaaw jàppante bu ëpp ñaari minit. Elton a ngi sukkandiku ci dooleem (120 kg), ngir moy ñaari yoon njuuy yi ko Yékini tegaloon, laata mu koy daan.

Gannaaw bi mu ñàkke joηante CLAF bu daaw, mbëru ekiri Bàlla Gay jél na ñetteel yoon bi. Mi ngi topp ci Suley Dop mu ekiri Siin-Saalum (mi ko jéloon ci atum 2008) ak Lak de Geer 2 bu Waalo (mi ko jéloon ci atum 2007).

Tolli ci 21 at, Seex Kan mi bokkon ci puul A bu CLAF, moo daan Bismi Ndóoy, Maam Góor Juuf ak Mataar Géy, laata muy daan Yuusu Nduur (mi mësoon a jél raaja njiital nguur gi) ci génn-wàllu finaal bi.

Ci jalbéen ga, Ndóof mu ekiri Faas moo daan Fëgëlu bu ekiri Lansaar. Ndamal Ndóof li dina may ekiri Faas mu noyyiwaat tuuti.
Waaye Amaneex, bu ekiri Lébugi, mooy ki fa gënoon a ràññiku. Moo daan Mon 1 bu ekiri Siin-Saalum ak teknig bu rafet. Diisaayam teewul Amaneex jëfandikoo woyofam ngir jéll aji-jàmmarloowam.
Du lu Móodu Xule bu ekiri Bàcc Séeraas, def. Moom Paap Seen bu ekiri Mbay Faal la ko daan. Doomu Jalaaw bu ekiri Caaroy moo daan Usmaan Juuf bu ekool bére bu Mbay Faal. Promotëer Gaston Mbeeng a amaloon joηante bére CLAF boobu.

Delluwaay:

APS : Dibéer 5 Sulet 2009.