Dog-dogi mbëj (electricité) ñëwaat nañu ak doole ay fan a ngii ci anéeru Ndakaaru, rawatina ci goxu Caaroy Gaar mi askan wa xamatul lumuy wax. Kaarce bee ngi cig lëndëm 10 waxtook léegi.

Muy mbir mu tiitlu ndax ñu ngi ci ndorteelu ubbiteg lekkool yi. Askan wee ngi wone ag naqaram tey yékkati kàddoom: « Senelec deful benn yégle jëm ci dog-dogu mbëj bu yàgg bii » lañuy wax. Teewul, askan wa fa dëkkee aartu nañu ne dees na leen dégg bu beneen dog-dogu mbëj bu yàgg amee.

Coste: Seneweb

Wolof: E. M. Ngeer - Xibaaryi.com

Ndakaaru, 1mee (APS) - Mbootaayi sendikaa yu bari dinañu màggal, talaata jii ci Ndakaaru ak ci diiwaaan yi, bis bi àddina sépp jagleel liggéey. Dinañu ci def ay doxu liggéeykat (defile), ay ndaje aki waxtaan, laata ñuy amal jotaay bi ñuy jébbalee téerey mbébét yu sendikaa yi, ca njénde réew mi.

CNTS, di mbootaay mu ëmb ay liggéekat, dina amal ab doxub liggéeykat  buy tàmbaalee ca Gafag Liggéeykat yi (Bourse du travail) ca xàllu Lamin Géy, bu 7 waxtu jotee. Dinañu jaar xàllu Lamin Géy, teg ci bulwaaru Réew mi, door a dugg xàllu Leopool Sedaar Seηoor, ngir teeree ca Pencum Tembute ga (Indépendance), fa ñépp di daje.

CNTS/FC, di mbootaay mu ëmb ay liggéeykati Senegaal/Kàttanu Coppite, dina amal it ab doxu liggéeykat buy tàmbalee digante xàllu Maalik Si ak bob Balees Jaañ, digante 10 w ak 10w30.

Dina jaar xàllu Jean Sores ak Palaas Washington, laata muy jot xàllu Leopool Sedaar Seηoor ak Taaxub Saytu Réew mi, di fa ñuy teeree.

Mbootaayu Sendikaa yi demal seen bopp  (CSA ci farañse) ak Bennoog liggéeykat yu Senegaal yi (UTS ci farañse) dinañu ànd amalandoo ‘’am ndaje’’ ca Iniwersite Seex Anta Jóob bu Ndakaaru, dinañu fa waxtaan ci : ‘’Bennoog sendikaa yi, ab wartéef ngir dooleel liggéeykat yi’’.

Bennoo Sendikaay Senegaal yiy demal seen bopp  (UNSAS), moom dina dajale ay ñoñam ca gaaraasu Géejaway, ca kaarce HLM yu Ndakaaru, ngir amal ab doxu liggéeykat.

Mbootaayum demokraasi bu liggéeykat yu Senegaal (CDTS) dina boolee ay ñoñam ngir waxtaan ci : ‘’liggéeykat yi ak jafe-jafe dund gi ak nekkin wi, gàllankoor yi, njariñ yi ak Seenu yi‘’. Ndaje la muy ame ca stàdd Leopool Sedaar Seηoor ci 10 waxtu.

Jukki bi mu askanoo

SAB/ESF 

Wolof: A. M. NGEER - Xibaaryi.com

« Duma kuy jaay. Ku gore laa . Musumaa sàkku lenn ci kenn. Te sax, buma doon kuy jaay, duma jar 4O milyoη FCFA. Nit ku jaayu, ñàkk boppam ci saa si ».

Kàddu yooyu la Sëriñ Maam Moor Mbàkke, mi doon janook way-tas xibaar yi ci këram, toontu ngir indi  ay leeral ci tuuma yi tukkee ci ngan gi ko njiitu réew mi Abdulaay Wàdd, bokk ci ñiy sàkku boppu réew mi, gane woon ca Bàmbey.

« Neena, Yore naa Al Azhar ci sama alalu bopp te musu maa sàkku ndimbal ci kenn. Lépp lu ma murid yi jox, dafa fekk rekk ñu gis ci man seen sëriñ te musuñu maa laaj fumay def xaalis bi ».

Sëriñ bi yokk ci ne ci atum « 2008, kolonel Maalik Siise, àndak Faatu Géy Saar », fekk nañu ma Washington ci turu njiitu réew mi Wàdd. « Ñu xamal ma dogal bi njiitu réew mi jél ngir di dugal, at mu nekk, 500 milyoη ci Iniwersite Al Azhar. Dogal boobu, ba léegi amul, moonte fàttaliwuma leen ko. Bu ma xaalis ñoroon, kon at mu nekk ma taxaw këram. Duma kuy wàcc, ngir daray àdduna, ci yoon wi ma gëm ».

Sëriñ Maam Moor xamalaale na ci ne bokk na ci ñiy xalaat ne sëriñ si dañoo war a génn ci wàllu politig bi luku moy ñu def leen ni ñépp. « Joxewu ma kenn ay njàngale, li ma xalaat rekk laa wax », la mujjee leeral.

Dutee maa ngi sant Njiitu réew mi Wàdd ngir yég gi mu am ci liggéeyu Sëriñ Murtadaa Mbàkke bi.

Jikki bi mu askanoo

Aji-tekki ji ci Wolof: A. M. Ngeer - Xibaaryi.com

Dees na mujj yaakaar ne nu ngi dund dëgg-dëgg ak ñu ñaaw jikko. Yenn xew-xew yi dina ñu yóbb ñuy xalaat ne yenn nit ñi amu ñu ag ruu akug ràññee. Xel-ñaar nanu lool laata nuy siiwal bile jukki. Xaar nanu bisu lëm ngir am firnde ci aji-amal emisiyoη bi ne amna ñu baax ñu bëgg jokkook soxna si ngir dimbali ko.

Soxna su dëkk Wakaam a ngi dund jamono ju lëndëm te metti ci àddunaam. Bi mu ñàkkee jëkkëram bi mu amal benn doom ju jigéen, ci la séyaat ak benn waay ju mu amal ñaari doom. Tey jii doomam ju njëkk ji mu amoon ci séyam bu njëkk, toll ci 17 at, mooy kiy génn ak jëkkëram. « Waaw yaay, maa ngi dëggal ne damay génn ak sama baayu-jiitle te lu baax la ci nuy ñaar. Mbaa du dangaa fiire ? May nu jàmm te bàyyi nu nu dund ! » La xale bi toontu yaayam bi mu ko laajee gannaaw bi mu ñaawee-njoort. Soxna see ngi muñ ci biir këram, jëkkëram di séy ak doomam. Rax ci dolli doom ji jugul di ndamoo ni baayu-jiitleem di jaxasook moom.

Jëkkër ji moom di it baayu jiitle xale bi, amul lenn lu mu wax ludul naan soxna si mu dal te bàyyi ko mu bànneexu ak doomam. « Moom laa gën a yég ci yaw. Ci moom laay gën a yég bànneex. Bàyyi nu nu dund ci jàmm ndax moo may jox lu ma amul ci yaw. » Di kàddu yi ko jëkkëram sànni doonte am nañu doom yu am 15 at ak 12 at.

Lan moo dal ñaar ñii ak soxna si?  Lu waral lii ? Lu yóbbe xale bu jigéen bi muy dundak baayu jiitleem ? Lu waral góor gii muy séy ak ndey ak doom te wóor ko ne lislaam dakoy tere ? Lu tax ndey ji jémmul dara ci lii ?

Jukki bi mu bawoo

Coste: SenewebRadio
Déglul dénkaane ndey jii doom ji nangu jëkkëram